معلش كلمتين أقولهم لبعض الثوار وممكن يتضايقوا مني كالعاده ولكن واجبي وضميرى يُحتم علي اني أقولهم علشان ممكن تفهموهم في يوم من الأيام
انا مش بمشي مع الزفه وانتم أكيد عارفين كدا كويس والصح بقول عليه صح والغلط بقول عليه غلط ومش بيهمنى صورتي ولا كلام الناس
الناس اللي بتقول ننزل استفتاء ونحاول نغير الواقع عن طريق النزول تقريبا نفس الناس اللي كانوا بيدعوا للنزول للتصويت لخالد على وتقريبا نفس الناس اللي كانوا بيدعوا للتصويت لحمدين صباحي وفجأه منهم اللي غير موقفة قبل ميعاد الإنتخابات ودعا خالد على للانسحاب وقالوا ساعتها مينفعش ندخل انتخابات غير نزيهه
طيب ايه الجديد الان ما انتم بتدعون للنزول الاستفتاء وقول لا للتعديلات الدستورية فإما انكم هتنزلوا فعلا وبعد الإستفتاء تقولوا ايه دا دا الاستفتاء دا غير نزيه وسبحان الله هتتفاجأوا بالنتيجه أو إنكم هتعملوا زي ما عملتم مع خالد على وتدعون للمقاطعه قبل ميعاد الإستفتاء علشان مفيش ضمانات لنزاهة الإستفتاء
يعنى في كلا الحالتين الوضع اللي احنا فيه لا يوجد فيه جديد عن ما حدث في الانتخابات السابقة فما سر تكرار الدعوات للنزول الى الإستفتاء
هل في حاجه جديدة ظهرت علشان تجعلكم مقتنعين ان الاستفتاء هيكون نزيه أم إنكم ماشين في الزفه زي كل مرة؟
وكلمة تانيه موضوع اننا نقلد تجارب أمريكا الجنوبية في إسقاط الدكتاتوريات بها فهذا كلام فارغ لأن شعوبنا وتقاليدنا وثقافتنا وظروفنا وإعلامنا مختلفين تماما عن هذه الدول فمينفعش نكرر تجاربهم بالكربونه علينا هنا
بس كدا
هذا رأيي وفي النهاية هلاقيقكم قبل الاستفتاء أو بعده كالعادة تتفاجأوا بالواقع الأليم لأننا للأسف شعب بينسى بسرعه وبيحب يكرر أخطاءه