ايه رأيك فى ضباط 8 ابريل والضباط اللى شاركت في الثورة

3 مارس 2018

وانا شغال أوبر ركب معايا واحد شاب وكان مشواره طويل شويه وأنا فى العادى مش بتكلم في السياسه مع عملاء أوبر ولا بقول لهم كمان السوابق السياسية بتاعتى ولكنه أول لما ركب معايا كان بيسألنى فى قضايا سياسية وكأنه بيعمل استطلاع رأي فسألته أنت بتشتغل ايه فقال لى صحفى في القضايا السياسية فقلت فنفسي اعمل استطلاع رأي لنفسي وأعرف توجهه السياسي

فسألته ايه رأيك في حمدين والاخوان و الخ الخ ففهمت من كلامه انه من الثوار اللى ليس لهم انتماء سياسي
فجيت أسأله ايه رأيك فى ضباط 8 ابريل والضباط اللى شاركت في الثورة فقعد يهاجم فيهم ويقول لى دولم كانوا مخابرات ومدسوسين ومتحبسوش ودلوقتى شغالين فى مكاتبهم فى المخابرات

وتقريبا الاسم الوحيد اللى يعرفه مننا هو محمد الوديع وعارف كل حاجه عنه
مسكت أعصابى فقلت له اكيد مش كلهم زي بعض فاللى شارك في الثورة في اللى كان مدسوس وفى اللى باع وفي الوطنى يعنى كان من الثوار محمود بدر وعلاء عبد الفتاح وبردو هتلاقى كدا فى ضباط 8ابريل اللى هتلاقى الكويس والوحش واللى باع واللى مستمر الخ الخ
طبعا كل كلامى كان فى الهواء وهو مش راضى يقتنع فاضطريت أقول له يؤسفنى إنى أصدمك وأقول لك انى انا كنت من هؤلاء الضباط واتسجنت وطلعت معاش مبكر ومش شغال فى المخابرات وشغال ادامك أوبر أهو
الراجل اصيب بالصدمة

وافتكرنى بشتغله فطلعتله البطاقه فدقق فيها علشان يتأكد فقال لى انت اتحبست فين فقلت له فى سجن المخابرات ثم السجن الحربي فمكنش مقتنع انى كنت محبوس فيه علشان كان سبق له وقت الثورة أنه اتحبس فيه فوصفت له كنت محبوس فين فى السجن الحربى وقلت له كنت محبوس فى عنبر الإعدام فصدق فى النهاية وهو مصدوم بالواقع اللى شايفه

فقلت له ان بعض الظن اثم
للأسف دا واحد من اللى شارك فى الثورة وصحفى سياسي وهذا هو إنطباعه عننا فما بالك بباقى الثوار اللى بيصدقوا أي حاجه اتكتبت أو اتقالت عننا أو حكموا علينا بتصرفات البعض منا

اترك تعليقاً إلغاء الرد

يجب أنت تكون مسجل الدخول لتضيف تعليقاً.